Mae Cwmni Theatr Arad Goch, Aberystwyth, wedi ennill gwobr Defnydd o’r Gymraeg yng Ngwobrau Elusennau Cymru, a drefnir gan Gyngor Gweithredu Gwirfoddol Cymru (CGGC / WCVA), i gydnabod ymrwymiad y cwmni i hyrwyddo, dathlu a datblygu’r Gymraeg fel iaith fyw.
Mae’r wobr yn cydnabod gwaith Arad Goch i greu ecosystem lle mae’r Gymraeg wrth galon ei weithgareddau, gan gryfhau ei defnydd bob dydd ac agor drysau i gyfleoedd cymdeithasol, creadigol a phroffesiynol drwy gyfrwng y Gymraeg.
Fel cwmni theatr sydd wedi’i leoli yn Aberystwyth, mae Arad Goch yn rhoi’r Gymraeg wrth galon ei waith, o’i gynyrchiadau theatr a’i deithiau ledled Cymru i’w glybiau drama, gweithdai, prosiectau cymunedol a’i weithgareddau yn y ganolfan. Mae’r cwmni’n ymrwymedig i bolisi Cymraeg yn gyntaf, gan sicrhau bod y Gymraeg yn rhan naturiol o bob agwedd ar ei waith.
Mae Arad Goch hefyd yn creu cyfleoedd i blant, pobl ifanc, teuluoedd, artistiaid a gweithwyr llawrydd ddefnyddio’r Gymraeg mewn amgylcheddau creadigol a phroffesiynol. Drwy gefnogi artistiaid i weithio drwy gyfrwng y Gymraeg, cynnig cyfleoedd i bobl ddatblygu eu sgiliau iaith a chreu profiadau celfyddydol hygyrch i gynulleidfaoedd newydd, mae’r cwmni’n helpu sicrhau bod y Gymraeg yn parhau i ffynnu ar lwyfan ac oddi arno.
Mae gwaith rhyngwladol Arad Goch hefyd yn cyfrannu at godi proffil y Gymraeg y tu hwnt i Gymru, gan rannu theatr Gymraeg â chynulleidfaoedd a chydweithwyr rhyngwladol a dangos bod y Gymraeg yn iaith fyw, greadigol a chyfoes.
Wrth dderbyn y wobr, mae Arad Goch yn dathlu cyfraniad ei staff, artistiaid, gwirfoddolwyr, partneriaid, cyfranogwyr a chynulleidfaoedd, sydd i gyd yn rhan o’r ymdrech i sicrhau bod y Gymraeg yn parhau i gael ei defnyddio, ei chlywed a’i dathlu ym mhob agwedd ar fywyd.
Mae’r gydnabyddiaeth hon yn atgyfnerthu cenhadaeth Arad Goch i greu cyfleoedd i bobl o bob oed brofi, mwynhau a defnyddio’r Gymraeg drwy’r celfyddydau, gan helpu sicrhau dyfodol llewyrchus i’r iaith.
